Nihanda yama

නිහඬ යම නිහඬ බව
බිඳින නුඹෙ සුසුම් සර
හෙමි හෙමින් දෙකොපුලේ
දැවටුණා හොරෙන් මට
නෙතට නෙත හමුවුණා
ඇගිලි තුඩු දැවටුණා
ලොවක තුටු කඳුලු මැද
අපට අප හිමි වුණා

-යශෝධා අධිකාරි-

Sura liya

සුර ලිය නෙත් අග කැල්මන් විදහා
හෙමිහිට හොරැහින් ඉඟි බිඟි දුන්නා
කවියක් වාගේ හිත සනසවනා
ඇය මගෙ ලෝකේ සුරඟන වුවා

සිහින් සුමුදු අතැගිලි දවටාගෙන
හීන කතා සවනට මුමුණයි ඈ
ආදර හැඟුමින් හිත පුරවාගෙන
උණුහුම් පපුවේ ගැස්ම විදියි ඈ

දිලිසෙන නෙත් යුග විදහා මා වෙත
පාන සිනාවට වසග වෙලා මම
අද මෙන් ඉන්නම් නොවෙනස් ප්‍රේමෙක
මියෙනා තුරු ඇය මේ තුරුලට ගෙන

-යශෝධා අධිකාරි-

Hithe numba gana

හිතේ නුඹ ගැන කියන්නට බැරි හැඟීමක් පිපෙමින් තියෙයි
අගේ නොකරම එය කියන්නට මගෙ දෙතොල් බියකින් සැලෙයි
හිනා මල් ටික නෙලා ගන්නට මගේ හිත මට බල කරයි
කීවොතින් නුඹ අහිමි වෙයිදෝ කියා මට හරියට බයයි

සිත පුරාවට සුවද විහිදන මල් හිනා හරි සුන්දරයි
කවි කතාවට බොලඳ තාලෙට මගේ නෙත් හොරැහින් බැඳෙයි
නුඹේ ඇස් වල ප්‍රේම බැල්මට හිත මගේ ඉද හිට සැලෙයි
නුඹේ ඔය සුදු වත මගේමයි හැඟේ මම හරි ආදරෙයි

-යශෝධා අධිකාරි-

Aayeth aayeth

ආයෙත් ආයෙත්  දකිනා ඔය දෙනුවන් දෙනෙතට කඳුළැල් දෙනවා
කීවත් ආයෙත් නොඑනා බව හිත නුඹවම අයදිනවා
හීනෙන් වාගේ ගෙවුනු අතීතෙක මම තව ළතැවෙනවා
ඔබ වෙනුවෙන් මේ හිත හැමදාමත් මියෙමින් ඉපදෙනවා

දෝරෙ ගලන කඳුළැල් දැක නුඹ හොරැහින් මට හිනැහේදෝ
කලක් පුරාවට පෙම් කළ ඒ හිත හඬවා සැනසේදෝ
දෙපා අයැද පෙම අයදින මේ දුක නුඹහට නොපෙනේදෝ
සදා ඔබට පෙම් කළ මා ගැන ඔය හිත නොම උණු වේදෝ

සමාව දෙමි ඔබ කළ හැම වරදට මේ හිත හඬවාලා
කඳුළු පිසින්නට ආයෙම ආවොත් මා ඔබගෙම වෙනවා
නාවත් කිසිදා මා වෙනුවෙන් යළි කළ පව වැටහීලා
අපි අපේම වුණු හීනේක මම හැමදාටම තනි වෙනවා

-යශෝධා අධිකාරි-

Nura deneth aga

නුරා දෙනෙත් අග හොරැහින් පෙම රන්ඳා
නුඹේ සිනහ මල් ඉදහිට ඉඟි දුන්නා
මගේ හිතට හෙමිහිට එබිකම් කරලා
හිතේ ඇඳුනු සිතුවම සායම් කෙරුවා

මවා හීන හිත තුළ නුඹ අපි ගැනම
කීව කතා රැය එළිවන තුරාවට
මගේ සිනා වෙනුවෙන් දුක දරාගෙන
කලක් පුරා නුඹ සිටියා බලාගෙන

නුඹට විටින් විට දොස් දුන්නත් නපුරූ
හිතින් මමත් නොමදව හෙළුවා කදුළූ
අතැර නොයා නොසැලී මා ලග රැදුණූ
නුඹේ නමට පුද දෙමි අද හිත බැදුනූ

-යශෝධා අධිකාරි-

Wisirunu sithuwili

විසිරුණු සිතුවිලි මුව රැඳි හසරැලි
නෙත් අග සිරවුණු උණුසුම් කඳුලැලි
මගෙ පපුතුර මැද ඔබ හෙමිහිට විඳි
හැඟුමන් මතකද පෙර දා අප බැඳි

සුළැඟිලි පටලන් තුරුලට සිර වී
ඇස් වල බැල්මට ඉඳහිට ගොළු වී
නුඹෙ සුසුමන් මගෙ වත මත සුව දී
පැවසූ රහසට මම පෙම් බැන්ඳී

කෙතරම් දුක් මැද සිටිය ද ලං වී
දින සති ගෙවුනත් නෑ අපි වෙන් වී
ගෙන යමි ඔබ ගෙල දම් හත පැලඳී
නොබිදෙන පෙම භව හතකට පුද දී

-යශෝධා අධිකාරි-

Mohothin mohothata

මොහොතින් මොහොතට නුඹ ගැන මතකය හිත තුළ තෙරපෙනවා
වදනින් වදනට අරුතක් නොම වුණු කවි වැල් ලියැවෙනවා
මුලු ලොව නිදනා තුන් යම මා සිත නොනිදා ගතවෙනවා
නුඹගෙන් තොර තව දවසක් ගැන සිත හිතමින් ලතැවෙනවා

හසරැලි ගැවසුන අතීත මතකය දින දින සැඟවෙනවා
ඔබ හා මැව් ඒ හීන කතන්දර මතකෙන් වියැකෙනවා
පුද දුන් ප්‍රේමය වියැකුණු බව දැන කඳුලු ගලා එනවා
ඔබේ මගේ පෙම ඇදි සිතුවම් වල සායම් බොඳවෙනවා

-යශෝධා අධිකාරි-

Numbata pem kala kaalayak

නුඹට පෙම් කළ කාලයක් ගැන මතක තුළ තව තියෙනවා
ඇයිද මම පෙම් කළේ නුඹ හට කියා මගෙ හිත අහනවා
දෙන්න පිළිතුරු නැතුව මගෙ මුව තවත් ගොළු වී ඉන්නවා
සසර ගමනේ පව් මකන්නට නුඹයි ආවේ සිතෙනවා

දුන්න දිව්රුම් බින්ද හින්දා පව් පිරෙන්නේ නුඹටමයි
වින්ඳ දුක් මම දිනක මතු දා විඳින්නට වෙයි සත්තමයි
සින්ද හදවත් මගෙ වගේ වෙන වස් තියනවා
ඇත්තමයි
දිනක නුඹ හට ඉතිරි වෙන්නේ සතුට නොව දුක විතරමයි

සත්‍ය පෙමකට තුන් හිතින්වත් වස් තියන්නට බැහැ තමයි
දුන්නු පෙම නුඹ දුන්නු ගින්නට ඇවිලිලා අලු වූ වගයි
ඉතිරි වී නැත හිතේ ඇල්මක් නුඹෙ නමින් වස් විතරමයි
හිතක් රිදවා සතුටු වුනු නුඹ හඬන දින හසරැලි මටයි

-යශෝධා අධිකාරි

Obath mamath

ඔබත් මමත් පෙරුමන් පුරවා දුටු සිහින කතා සුනු විසුනු වුණාවේ
අපේ හැඟුම් මල් සුවඳ දවාගෙන ගොම්මන් අදුරේ පරව ගියාවේ
නුඹේ කඳුලු දුටු මේ නෙත් යුග යළි වෙනකෙකුගේ හසරැල් නොවුනාවේ
මගේ නමින් වෙන් වූ නුඹෙ හදවත මට විතරක් තව පෙම් කෙරුවාවේ

අපරිමිත පෙම වටහගනු බැරි ලොවක් අභිමුව නැවතිලා
කුමට සඟවන් සිටිනු අප හිත් දෙලොව අතරම සිරවෙලා
ගියත් දිවුරා නැවත නොඑනා බවට යළි අප සිහිවෙලා
නුඹත් මම මෙන් විදවනා බැව් දනිමි අප දිවි ඇති තුරා

-යශෝධා අධිකාරි-

Thaniwa gewana thun yamak

තනිව ගෙවනා තුන් යමක්
දෙතැන හඬනා හිත් දෙකක්
සැබෑ නොවෙනා එකම හීනෙක
සිලිලි සැලු ගොළු ගීතයක්

ළපලු තුරු ලිය සිසිල් දිය මත
ගොතන සෙවණැලි රටා මතකය
ඇගේ සුරතේ සිහින් ඉරි මත
ඇඟිලි තුඩු දැවටුනා මතකය

සුරත් පැටලුනු අතීතෙක හිඳ
සිහින් වැලි මත තැබූ සළකුණු
සුළං සර මැද රැල්ල සිඹගෙන
ගියා අද මෙන් තාම මතකය

-යශෝධා අධිකාරි-

Athwal patalunu mathaka walawan

10.අත්වැල් පැටලුණු මතක වළාවන් හිතේ වියන් බැද තියේවී
ආදරයෙන් හිස සිඹගත් දිනයන් මතකෙන් අමතක නොවේවී
වෙරළ මායිමේ කඳුලු හැලූ හැටි අදටත් ඇස් බොඳ කරාවී
ඔබේ මගේ පෙම් කතාව හිත තුළ ඉඳහිට සක්මන් කරාවී

ආ මග වැරදුණු බව තේරෙන විට ආ දුර වැඩි බව මට හැගුණා
ඒ සිතුවිලි හිත තුළටම තෙරපා අපේ හීන තව තව දුටුවා
නෙතේ කඳුලු වැල් වදනට පෙරලා ගන්නට නොහැකිව අපි හැඬුවා
ඔබෙයි මගෙයි ආදරයට අරුතක් දෙන්නට බැරි බැව් හිත කීවා

ආදර ගීයක නැවතුම දුටුවත් සිතුවිලි වල නැවතුමක් නැතී
ගතින් දුරස් වුණු යුවලක් විලසින් උන්නත් ප්‍රේමය නිමා නොවී
ඔබත් මමත් අද දෙමංසලක හිද අතීතයට පිය නගනු ඇතී
ආදරයේ දෙව් රුව ඔබ වේ ඔබ තුළ මා තවමත් වෙමි පතිනී

-යශෝධා අධිකාරි-

Nethata netha

නෙතට නෙත හමු වුණා නෙත් අගින් ඉඟි කළා
නෙත් වසන ඇසිල්ලෙන් හිත් හුඟක් දුර ගියා
උණුසුමට ලං වුණා ගතින් ගත සැනහුනා
නෙත් අරින ඇසිල්ලෙන් ඔහු හුඟක් දුර ගියා

නෙත් අගින් කඳුලු වැල් නොනැවතී වැගිරුනා
මුලා වූ හිතේ ගිනි බුර බුරා ඇවිලුණා
පරම පෙම පර වුණා ශ්වේත ධජ එසවුනා
අසම්මත ප්‍රේමයත් ඇය සමග වැළලුණා

-යශෝධා අධිකාරි-

Lowata horen

ලොවට හොරෙන් ඔබටත් හොරෙන්ම මම මේ හිත පිදුවා ඔහුගේ නාමෙට
මටවත් නොදැනිම ටික ටික ලියලුණු කුළුදුල් ආලය ඇත අඩමානෙට
ඔහුත් ඔබත් එක ලෝකෙක සිටියත් මක් කරම්ද මගෙ තහනම් ප්‍රේමෙට
ඔබගෙන් උදුරා ගමි මම ඔහු අද සමාවෙන්න මිතුරිය මගෙ වරදට

ආදරයේ අර්ථය විමසන්නට ඔබ ඔහු එක මග පිය මැන්නා
එනමුදු ඔහු හිමි ඔබ හට නොව මට නිසාම ඔහු මා එක් වූවා
වරද ඔබේ නොව වරද අපේ නොව කාලය එය විසදුව හින්දා
නිහඬව ඔබ දුක වාවා ගනු මැන ඔහුගේ හද හිමි මටම නිසා

ඔහු මට පෙර ඔබ හට හමු වූ වග නැවත නැවත මට කියනු එපා
දෙහදක ප්‍රේමය මා බිඳලූ බව පවසා මා හඬවන්න එපා
ඔහු ඔබගෙන් ලද ආදර සැමරුම් අතීතයට මුසු කරපු නිසා
නුඹෙ කඳුලට ඉඩ දී යන්නම් ඔහු මා කැන්ඳාගෙන යන හින්දා

-යශෝධා අධිකාරි-

Hithak pirena tharam

හිතක් පිරෙනා තරම් පෙම් වදන් පුරෝගෙන
ගතම කිතිකවාලන පෙම් සිනා අයාගෙන
සසරෙ ආවා වගේ පසු පසම හඹාගෙන
එන්නෙ කවදාද නුඹ මගේ පෙම පතාගෙන

සසල සිත නිවාලන හැඟුම් මල් පූදුවන
හිරිවැටුණ ඇගිලි තුඩු ආදරෙන් පිරිමදින
කඳුලු පිස දා මගේ සෙමින් නළලත සිඹින
නුඹ එන්නෙ කවදාද ඉදිමි මම බලාගෙන

-යශෝධා අධිකාරි-

Ape wage premayak

අපෙ වගේ ප්‍රේමයක් ලොවේ අන් තැනක නෑ නුඹෙන් තොර ලෝකයක් යළිත් මම දකින් නෑ
හිනා වෙන ඇස් වලට කඳුළු නම් දෙන්නෙ නෑ ආදරේ නාමයෙන් නුඹෙන් වෙන් වෙන්නෙ නෑ

වචනයෙන් කියන්නට වචන ගලපන්න බෑ
ඒ තරම් වටින නුඹ අහිමි කරගන්නෙ නෑ
මගේ පණ වගෙයි නුඹ කාටවත් දෙන්නෙ නෑ
ආදරෙයි මියෙන කල් ඒ ඇයිද දන්නෙ නෑ

-යශෝධා අධිකාරි-

Muwaga thawarunu katha

මුවග තැවරුණු කතා හැඟුම් දෙන මල් හිනා
ඇගේ දැහැනෙන් මුදා හිතම හොරකම් කළා
මා ඇගේමයි කියූ අතීතය බොඳ වුණා
නුඹෙන් තොර ලොවක් මට ඉබේ අමතක වුණා

නුඹෙ සතුට ගැන සිතා මගෙ සතුට කැපකළා
නුඹේ මල් හිනා මගෙ ලොවට මල් වැස්සුවා
හදවතේ ආදරේ නුඹෙ නමට වෙන් කළා
දිනෙන් දින නුඹ හොරෙන් දුක හිතට ලන් කළා

පළමු පෙම සිහි කරන් මගේ හිත රිද්දලා
මගේ පිවිතුරු හැඟුම් ඔහු සමග සැසඳුවා
පැතුම් හැම බිඳ දමා කඳුලු කවි ලියැවුනා
මගේ ලොව නුඹයි කියු අතීතය මියැදුනා

නුඹේ ඇස් බොඳකරන් කඳුලු කැට ගිලිහුනා
ඉකිබිඳින තාලයට මගෙ හිතත් වැළපුනා
හැරයන්න තරම් මගෙ හිත හුගක් රුදු වුනා
නුඹෙ ලොවේ සතුට ගැන හිතා මම ගොළු වුනා

මගෙ නමට වස් තියා හෙමි හෙමින් මිමිණුවා
මගේ හිත ගැන නොදැන දොස් මටම පැවරුවා
සරසවිය ගැන නුඹේ හීන මල් ඵල වෙලා
මගෙ සතුටු කඳුලු මැද නුඹ හුඟක් හිනැහුනා

-යශෝධා අධිකාරිි-

Senehas ganga

සෙනෙහස් ගංඟා නැවතුනු මොහොතක කඳුලැල් මල් පිබිදෙන්න ඇතී
උදේ දිවා රෑ ඇස් දල්වාගෙන මගෙ ඇස් යුග සනසන්න ඇතී
දුරින් රැදුන මුත් සැමදා ලග ඉන්නම් සත්තයි මම කියන්නැතී
අපි වෙන්වූයේ අපෙ වරදින් නොව මගෙ පව් මට පල දෙන්න ඇතී

නොදනිමි මා නුඹ වෙන් වූ මොහොතක් මින් පෙර අප අත් භව වලදී
එනමුදු ඔබ මා හැරගිය වග නම් දන්නෙමි මේ අත් භවයේදී
වැරදි කළේ ආදරේ නමින් දැනගනීවි ඔබ මතු දිනයකදී
ඒත් මටයි මගෙ පව් වලටයි දෙන්නට ඔබ කළ පින් වේවි මදී

කළෙමි තවත් කිසිවෙක් ඔබහට නොදෙනා තරමට ආදරය නිතී
නොකළෙමි කඩ කිසිදින ඔබ පැතු හැම පැතුමන් පණ මෙන් අඩු නොමැතී
නොදැනුනි කල් යන විට ඔබ තුළ මට හිමි ප්‍රේමය බව ශේෂ නැතී
මගෙන් වු වරදක් දැයි නැතිනම් පින් මදිවද මට මා දන්නෙ නැතී

-යශෝධා අධිකාරි-

Awasanak pathu arabumak

අවසනක් පැතු ඇරඹුමක් නුඹ
අවසනෙහි තුටු කඳුලු නොපතන
කියන මතු මතු දිවුරනා මුව
ගොළු වුණා වස් දෙකක් ගිය තැන

තෙමෙන නෙත් යුග දෙපා පාමුල
කඳුලු සයුරක කිමිදෙනා රග
බලා හිනැහෙනු කිමද පෙම්වත
කඳුලු නවතනු බැරිද නෙතු අග

මුවින් දිවුරූ වදන් බොරුමද
පණ වගෙයි කියු කියුම් වැරදිද
අරුත් සුන් වුණු මතකයන්මද
ඉතිරි වන්නේ මියෙන තුරු මට

අනිත්‍යයි කියු හැඟුම් අභිමුව
මගේ ප්‍රේමය අනිත්‍යක් නොව
සදා නොවෙනස් සිතක් නතු කර
පෙමක් නැති ලොව වසනු කුමටද

-යශෝධා අධිකාරි-

Kavi liyana agili thudu

කවි ලියන ඇඟිලි තුඩු සියුම් සම මත අඳින
බලි කුරුටු මියන කල් සුෂුම්නාවෙන් මිදෙනකන්
ආදරෙයි ඔහු ආදරෙයි

ඇවිද ගිය දුර ගෙවා නැවත ආපසු ඇවිත්
රසය පුන පුනා විද වාශ්පත් හිඳෙන තෙක්
ආදරෙයි ඔහු ආදරෙයි

හදවතේ ආදරය ගතින් නොව සිතින් බව
කියා වද කරනකන් ප්‍රතික්ෂේපම කරනකන්
ආදරෙයි ඔහු ආදරෙයි

හීන දුන් කඩුපුලට සිහින් පිනි වැටෙනකන්
චන්න එලියට දිලෙනකන් සුවඳ හුරු බව දැනෙනකන්
ආදරෙයි ඔහු ආදරෙයි

සුවද සෙපාලිකා මල් මත ඉර  උදාවට සුවඳ මියෙනා
බවක් දැනගන්න තෙක් දුන්න දිවුරුම් බිදෙනකන්
ආදරෙයි ඔහු ආදරෙයි

කවි ලියන ඇගිලි තුඩු ගෙවෙනකන් හිත පිරිමදිනකන්
නුඹේ වචනයට පෙම් බැඳි හිත නුඹට වස් තියනකන්
ආදරෙයි මම ආදරෙයි

-යශෝධා අධිකාරි-

Lawan hasa thepul pem

ලවන් හස තෙපුල් පෙම් වසත් සම නිමා විය
හිතක් බර ආදරය නෙතට බර කදුලු විය
ඇතත් මට නැතත් නුඹ, නුඹට හිමි ආදරය
තියන් හිත හෙටත් මම ඉදිමි වාවන් තනිය

මටම නුඹ අයිති නැති දිනක් එයි මතු කලෙක
එතෙක් ඉවසලමි දුක කඳුලු වත්කර විටෙක
නුඹ පැතුම් දරන් යන දිනට ඇය ගෙන දුරක
මළ වතින් යමි ලැගුම් සොයා පෙම නැති ලොවක

-යශෝධා අධිකාරි-